ಸಮಯವಾಣಿ ಡೆಸ್ಕ್ ಇಂದಿನ ಆಧುನಿಕ ಯುಗದಲ್ಲಿ ಮಕ್ಕಳಿಗೆ ಶಾಲೆಗೆ ಹೋಗಲು ಸ್ಕೂಲ್ ಬಸ್, ಸ್ಮಾರ್ಟ್ ಕ್ಲಾಸ್, ಕುಳಿತುಕೊಳ್ಳಲು ಡೆಸ್ಕ್ ಹೀಗೆ ಸಕಲ ಸೌಲಭ್ಯಗಳಿವೆ. ಆದರೆ, ೮೦ರ ದಶಕದ ಗ್ರಾಮೀಣ ಪ್ರದೇಶದ ಶಾಲಾ ಮಕ್ಕಳ ಬದುಕು ಇದಕ್ಕಿಂತ ಸಂಪೂರ್ಣ ಭಿನ್ನವಾಗಿತ್ತು. ಸೌಲಭ್ಯಗಳ ಕೊರತೆಯ ನಡುವೆಯೂ ಆ ಕಾಲದ ಮಕ್ಕಳ ಕಲಿಕೆಯ ಉತ್ಸಾಹ ಇಂದಿನ ಪೀಳಿಗೆಗೆ ಒಂದು ಅದ್ಭುತ ಪಾಠವಾಗಿದೆ.
ಬರಿಗಾಲು, ಕೈಯಲ್ಲೊಂದು ಸ್ಲೇಟು, ಬಳಪ ಅಥವಾ ಚೀಲದಲ್ಲಿ ಒಂದೆರಡು ಪುಸ್ತಕಗಳನ್ನು ಹಿಡಿದುಕೊಂಡು ಧೂಳು ತುಂಬಿದ ಮಣ್ಣಿನ ರಸ್ತೆಯಲ್ಲಿ ಮೈಲುಗಟ್ಟಲೆ ನಡೆದುಕೊಂಡು ಶಾಲೆಗೆ ಹೋಗುತ್ತಿದ್ದ ಆ ದಿನಗಳ ಹೋರಾಟ ಅಷ್ಟಿಷ್ಟಲ್ಲ. ಮಳೆ, ಚಳಿ, ಬಿಸಿಲು ಯಾವುದನ್ನೂ ಲೆಕ್ಕಿಸದೆ ಜ್ಞಾನಾರ್ಜನೆಗಾಗಿ ಸಾಗುತ್ತಿದ್ದ ಆ ಮಕ್ಕಳ ಮುಖದಲ್ಲಿ ಸದಾ ಒಂದು ಮುಗ್ಧ ನಗು ಇರುತ್ತಿತ್ತು. ಶಾಲೆಯಲ್ಲಿ ಕುಳಿತುಕೊಳ್ಳಲು ಚಾಪೆ ಅಥವಾ ನೆಲವೇ ಗತಿಯಾಗಿದ್ದರೂ, ಅವರಲ್ಲಿ ಕಲಿಯಬೇಕೆಂಬ ಛಲಕ್ಕೆ ಯಾವುದೇ ಕೊರತೆಯಿರಲಿಲ್ಲ.
ಇಂದಿನ ದಿನಗಳಲ್ಲಿ ಸಣ್ಣ ಪುಟ್ಟ ಸೌಲಭ್ಯಗಳಿಲ್ಲದಿದ್ದರೂ ದೂರು ನೀಡುವ ಪ್ರವೃತ್ತಿ ಹೆಚ್ಚಾಗಿದೆ. ಆದರೆ ಅಂದಿನ ಗ್ರಾಮೀಣ ಶಾಲಾ ಮಕ್ಕಳ ನೈಜ ಚಿತ್ರಣವನ್ನು ಗಮನಿಸಿದರೆ ಒಂದು ಮಾತು ಸ್ಪಷ್ಟವಾಗಿ ಅರ್ಥವಾಗುತ್ತದೆ- “ಅವರ ಹೋರಾಟವು ಬಹು ದೊಡ್ಡದಾಗಿತ್ತು, ಆದರೆ ಪರಿಸ್ಥಿತಿಯ ಬಗ್ಗೆ ಅವರೆಂದೂ ದೂರು ನೀಡಲಿಲ್ಲ.” ಹಳೆಯ ಪುಸ್ತಕಗಳನ್ನೇ ಎರವಲು ಪಡೆದು ಓದುವ ಉತ್ಸಾಹ, ಗುರುಗಳ ಬಗ್ಗೆ ಇದ್ದ ಅಪಾರ ಗೌರವ ಮತ್ತು ಶಿಸ್ತು ಆ ದಶಕದ ಮಕ್ಕಳನ್ನು ವಿಶಿಷ್ಟವಾಗಿ ರೂಪಿಸಿತ್ತು.ಆ ಕಾಲದ ಮಕ್ಕಳ ಬಳಿ ಸೌಲಭ್ಯಗಳ ಕೊರತೆ ಇತ್ತೇ ವಿನಃ, ಖುಷಿ ಮತ್ತು ನೆಮ್ಮದಿಯ ಕೊರತೆ ಇರಲಿಲ್ಲ. ಅಂದಿನ ಆ ಕಠಿಣ ಪರಿಸ್ಥಿತಿ ಮತ್ತು ಬದುಕಿನ ಪಾಠಗಳೇ ಇಂದು ಆ ೮೦ರ ದಶಕದ ಮಕ್ಕಳನ್ನು ಸಮಾಜದಲ್ಲಿ ಗಟ್ಟಿಮುಟ್ಟಾಗಿ ನಿಲ್ಲುವಂತೆ ಮಾಡಿದೆ ಎಂದರೆ ಅತಿಶಯೋಕ್ತಿಯಲ್ಲ.
ಇತ್ತೀಚೆಗೆ ಸೋಶಿಯಲ್ ಮೀಡಿಯಾ ಓಪನ್ ಮಾಡಿದರೆ ಸಾಕು, 1980ರ ದಶಕದ ಸೂಟು-ಬೂಟು, ದುಬಾರಿ ಕಾರು, ಮತ್ತು ಸ್ಟೈಲಿಶ್ ಫೋಟೋಗಳನ್ನು ಹಾಕಿ ‘ನಮ್ಮ 80ರ ದಶಕದ ಲುಕ್ ಹೀಗಿತ್ತು’ ಎಂದು ಬಿಲ್ಡಪ್ ಕೊಡುವವರ ಸಂಖ್ಯೆ ಹೆಚ್ಚಾಗಿದೆ. ಆದರೆ, ನಿಜವಾಗಿಯೂ 80ರ ದಶಕದಲ್ಲಿ ನಮ್ಮ ಗ್ರಾಮೀಣ ಹಾಗೂ ಸಾಮಾನ್ಯ ಜನರ ಪರಿಸ್ಥಿತಿ ಹೇಗಿತ್ತು ಗೊತ್ತಾ? ಇಂಟರ್ನೆಟ್‌ನಲ್ಲಿ ವೈರಲ್ ಆಗುತ್ತಿರುವ ಒಂದು ಫೋಟೋ, ಈ ಕೃತಕ ಡೌಲತ್ತಿನ ಬಣ್ಣ ಬಯಲು ಮಾಡಿದೆ! ಆ ನಿಜವಾದ ಸ್ಟೋರಿ ಇಲ್ಲಿದೆ ನೋಡಿ.
ಹೌದು, ಸಾಮಾಜಿಕ ಜಾಲತಾಣಗಳಲ್ಲಿ ಈಗ ಈ ಒಂದು ಡೈಲಾಗ್ ಮತ್ತು ಫೋಟೋ ಸಖತ್ ಸದ್ದು ಮಾಡುತ್ತಿದೆ. ಅಂದಿನ ಕಾಲದಲ್ಲಿ ಬಹುತೇಕ ಮಧ್ಯಮ ವರ್ಗದ ಹಾಗೂ ಹಳ್ಳಿಯ ಮಕ್ಕಳ ನೈಜ ಪರಿಸ್ಥಿತಿ ಇದೇ ಆಗಿತ್ತು. ಸರ್ಕಾರಿ ರಸಗೊಬ್ಬರದ ಖಾಲಿ ಚೀಲಗಳೇ ಅಂದು ಬಹುಪಾಲು ಮಕ್ಕಳಿಗೆ ಸ್ಕೂಲ್ ಬ್ಯಾಗ್‌ಗಳಾಗಿದ್ದವು. ಹರಿದ ಚಡ್ಡಿಗಳಿಗೆ ದಪ್ಪ ದಾರದಿಂದ ಹೊಲಿಗೆ ಹಾಕಿ, ಮೈತುಂಬಾ ಧೂಳು ಮೆತ್ತಿಕೊಂಡು ಖುಷಿಯಿಂದ ಆಟವಾಡುತ್ತಿದ್ದ ದಿನಗಳವು.
ಇಂದಿನ ಯುವಕರು ಎಐ (AI) ಮತ್ತು ಫಿಲ್ಟರ್‌ಗಳನ್ನು ಬಳಸಿ 80ರ ದಶಕದ ‘ರೆಟ್ರೋ ಲುಕ್’ ಅಂತ ಸ್ಟೈಲ್ ಮಾಡುತ್ತಿದ್ದರೆ, ಆ ಕಾಲವನ್ನು ನಿಜವಾಗಿ ಬದುಕಿದವರು ಈ ಫೋಟೋ ನೋಡಿ ನಗುತ್ತಿದ್ದಾರೆ. “ನಮ್ಮ ಅಸಲಿ ಲೈಫ್ ಇದೇ ಆಗಿತ್ತು, ಯಾವುದೇ ಆಡಂಬರ ಇರಲಿಲ್ಲ, ಆದ್ರೆ ಆ ಸರಳತೆಯಲ್ಲೇ ನೈಜ ಖುಷಿ ಇತ್ತು” ಎಂದು ನೆಟ್ಟಿಗರು ಮಾತುಡುತ್ತಿದ್ದಾರೆ.
ನೋಡಿದ್ರಲ್ಲ ವೀಕ್ಷಕರೇ, ಸೋಶಿಯಲ್ ಮೀಡಿಯಾದ ಕೃತಕ ಜಗತ್ತಿಗಿಂತ, ಈ ಯೂರಿಯಾ ಚೀಲದ ಬ್ಯಾಗ್ ಮತ್ತು ಹರಿದ ಚಡ್ಡಿಯ ವಾಸ್ತವ ಎಷ್ಟು ತಮಾಷೆಯಾಗಿದೆ ಹಾಗೂ ಮುಗ್ಧವಾಗಿದೆ ಅಂತ. ಇದು ಇವತ್ತಿನ ವೈರಲ್ ನ್ಯೂಸ್. ಮತ್ತಷ್ಟು ತಾಜಾ ಸುದ್ದಿಗಳಿಗಾಗಿ ನೋಡ್ತಾ ಇರಿ, ಸಮಯವಾಣಿ ನ್ಯೂಸ್ ಗಡಿನಾಡು ಸಮಾಚಾರ ಸುದ್ದಿ.
